Traducción al asháninka: Marishori Samaniego

Versión en castellano

Abisanaki tsa pite (12) kashiri yajariyetakaro oshitobakoyeti ñabaimentotsi ñanakobenteroni abisayetatsiri anampiteki. Tema añakiro osarentsikika oshintsiperotanaki otanakaro obakiraini ompoñakotanaka mantsiyenkaro ashi kamantsitatsiri: kimitachari karira oinijayero omkaratsi ikantayetakiri obakiraini, yaminaperoitatsiro ishitobayetatsiri sankenatachani internet-ki irojatsita omtsikakoyeta kamantantsiperori.

Yokapayeka kamantayetantatsiri irojatsika ibashinontabaijetani ejatsita ikamekotantaki sankenarentsi obakiraini. Ikobaperiotatsi yaminakoperoiteri, aririka ontsimayeti kariperotantsi ikianajirika obakirari abinkatsareti anampiteki. Iro kantsimaitacha tekatsi tsikakobentantatsini yamayantajetyarini kimitachari kari tsipayetariri yantabaiyete abinkatsareti mairiajetakini.

Sankinakotanainchari obakiraini kari kobaperotanainchani

Yokapayeka sankinatakotsirori maroni abisayitatsiri itsayakobaiyetatyari. Oka kobenkatatsirika irashi atsiripaye (SLAPPs por sus siglas en inglés) ari onkantapintatya yajarityari kamantayetantatsiri kimitanainchari ñabaitakotsiriri maroni tsimayetanaintsiri osheki irikitepaye kantabayishetachari. Kimitachari abisapintatsiri airo yapatyitsiri kametsa intsikakobentantaiteri yamitakoyeteri airora ishintsibintaiteri kamantayetantatsiri.

Pintsabentsirori anampi irimachibitaka aminakobentabetarori airotsi oshitobakotanta ñantsipaye iro kantsimaitacha airotsi akimakotajiro iropero ikantayetakiri ejatsita saikayitatsiri apaniroini antayetsirori kamantayetantatsiri. Yamakobentabetaka obakiraini Ñanakobentantatsiri otsipayeki nampitsi, oka web-ka ari osaikakotsiri oinijakota ikantayetakiri. Irokantsimaitacha irojatsitani ikoshikabaijetsi Jebatsirori anampi ñantsipaye. Intatsikironta nampitsipaye itsikakobentaitatsiro internet patsiro airo oshitobakotsi iroperori ñantsi ñabaimentotsikipaye otsipa yakoyetsiro kametsa kamantantsi web-ki.

Apaniroini ikantajeta yantabaijetsini kamantayetantatsiri itsonkajetakiro jebaripaye jebayitsirori anampipaye ikampinaitakiro sankenarentsi kariperori patsiro airotsi yantabaijetajini ikamantakojetajini. Irotaki iroñaka yaminakoyetajero iroperori tsikakobentajeterini kametsa.

Oka osaikakotanaki sankenarentsi maroni tsikakobentajeterini maroniki kipatsikipayeki ejatsita okaratakotsi yajariyitari yantayetakiri kamantantatsiri. Ikamitakotaki yamayajetyani aririka yajarityaririka airorika itsikakobentayitsiri maroni yantabairipaye.

Tsaeyantsi

¿Piyotakotsima paitaka paitanaichari tsaeyantsi?, Okantakota tsaeyakotantsi aririka atsayakotante koshikantsi atsiripayeni. Ari okantakotsiri tsikakobentayitsirori irashi atsiriyitatsiri maroniki kipatsi saikakotatsiri nampitsipaye (Derecho Internacional de los Derechos Humanos), ari onkantakotyari itsayakoyitakiamirika aritaki yamitakoyitakimi patsiro pisaikanaji kametsa.

Oka iropero sankenatakotachari tsikakobentajeterini atsiriyitatsiri aririka ikoshikabaitaiririki tera oshiyakotyaro, opashinitashitanaka pashiniki nampitsipayeki. Irotaki, otanakiarika okobenkatanaki itsayakobaitemirika ontsimatsi pijate osaikakotsira pankotsipanko patsiro kametsa itsikakobentaitemi.

Tsimatsi iroperori ñantsi ikantayetemiri pamayantyari/kantakobentantsi aririka itsaeyakoityami

Airotsi yabiajeteroni itsikakoperoiteri kamantayetantatsiri, iro kantacha tsimatsi ñantsi inkantayeteri yabiayitantyaroni piyotantyari aririka pabisakotaji itsayakoyitakiamirika:

• Poijatakotero iropero ñantsi inkantayeteri irashi kamantayetatsiri. Pikobakirika poinijantero pisankinari ontsimatsi pakoyetero iropero kamantantsipaye ojatanakoyetita kametsa kenkitsarentsi. Ejatsi pakoyeteri kinkitsatakoteroni pastakotsimaityaro aririka pisankinatakirorika. Piñanate osheki piyotakotantyarori tsika okantya pakoyero aririka pikaimakirika, ejatsi pakotero kenkitsatantsipaye ejatsita piyotakoperotantyarori iroperori irashi kamantayetatsiri okaratsi ikantayetakiri.
• Pikenkishiriakotyarora pikantayetakiri ejatsita poenijayetero okaratsi piyotakotakiri. Paminaperoterora piyenkitsari patsiro airo pikonpitakantsi.
• Pitsimakotera pisankenari pantayetakiri obakiriani ejatsi pashinipaye paperishipaye. Ontsimakirika apani pikantayetiri koshekantsi ashi pimantayetatsiri, ontsimatsi poinijayero iroperori pikantayetakiri ejatsi ontsimatsi poinijayetakotero, irotaki pitsimakotapentiro poyinijantapintyarori.
• Maroni pakoyetakiri ñabaimentotsiki, inintakotakirorika pisankenatero iyotakotantanakiarori.
• Pibakoterora pibayiro ejatsi pibakoterora ibayiro irashi pashinipaye okametsaperotanakita. Airora pikompetaro pakotero piñakirorika osankinata pimaisantanakiro ninka antayetakirori
• Pinkenkishiriyaro airotsi poinijantakotero yantayetakiri pashinipaye tsaeyakotantsi. Irotaki pamaya aririta papitakotero ikantayetakiri pashinipaye sankenarentsiki. Ejatsita pipiyakotanterika ñantsi kariperori tsaeyantsipaye aritaki ikantakantayetakimi.
• Ejatsi Ontsimakirika pikanteri apani ñantsi, ontsimakirika pikantayeteri iroperotaki pipampitsashiriari pasankaniki.
• Piyotakotakirorika ashi tsaeyakotantsi pisankinatakotakiri, pamakobentya intsipaite pikamantante. Tsimatsi paperishiki okaratsi pikantayeteri, irotakirika tsaeyakotantsi. Pikinkisherirora tsikakobentantsi irashi tsaeyakotantsi opashinitashita pashinikipaye nampitsi.
• Onkamitakota ashi tsaeyantsi osamani opomirintsite ejatsita pinarontsirini. Aririka pabiakirorika, opinaro tsikakobentemini aritaki oshekitakotaki. Ontsimatsi poinijayero paperishi tsikakobentaperotimini apatani, kimitachari antabayitatsiri apaniroini.

Pitsikakobentero okaratsi pantayetakiri

Airorika yakoyetsiro kametsa kenkitsatantsipaye airotsi onkanta kametsa yantabairipaye ñantsi ñanakobenteroni okaratsi kamantayetantsika. Ontsimatsi intsikakobentaiteri maroni pakironi kamantantsipaye, ejatsita ipinayetiri kimitachari ipayetakiri kenkitsarentsi iyojetantanakiari maroni atsiripaye.

Ejatsi tsimatsi tsikakobentayiteroni ñantsipaye yantayetakiri osaikakotanaki pashiniki kipatsi, iyojetanakira iriperotaki payetakirori ñantsi irashi kamantantatsirini “Yaminakoyetatsironi” ejatsi “Yoinijayetero tsika onkantakota irekitepaye”. Aririka ishintsibentayeteririka ikamantakoyeteri ninkama pakirorini maroni ñantsipaye karira kametsatatsiri ejatsi irashi ñabaitakotakirori, aritaki oshiyanaki kariperotantsi tsaeyantsipaye.

Tsikama onkantakotyari antsikakobentero/Airo okobenkatanta ontsimatsi amanayetero okaratsi yantayetakiri

Koñatakoyetatsiri ñantsipaye internet-ki iroperotaki yakoyetero irashi kamantayetatsiri antabayitatsiri apaniroini. Ari okantakotakiri obakiraini Perugia irashi kamantayetatsiri: Atsipayetari antabayitatsiri kamanteroni janta internet-ki, noinijantemero iroperotatsiri ñantsi atsikakotantyarori okaratsi yantayetakiri:

• Atsikakobenteri ibairo aririka isampitemi.
• Tsame apayetante ñantsi okaratsi yantayetakiri “Otanakaro obakiraini” pikarajetanira.
• Tsame amitakotero ikantayetakiri ainijantakerorika kametsa amanakotatsiro. Amakobentajeteri ikarayejitsinira aparopaye.
• Piyotakotero aririka itsayakoitakiamirika pipakirika maroni kinkitsarentsi, airotsi ainijayero maroni yakoyetakiri janta obakoyetanta internet-ki.
• Pamakobentya apaniroini pibakoyetakiri internet-ki ejatsi ontsimatsi pimanakoperotero.
• Piyotakotero paitaka ajarimotamiri okaratsi pantayetakiri ejatsi tsikama pikanterori pimanaperotantyarori apiteroiteni.
• Poinijanyetero maroni paperishi ejatsi maroni obakotanainchari oshitobakoteta kametsa. Pinkinkisheriro iroperori apatoyetaka maroni kenkitsarentsiki.
• Pishakoyetajiro okaratsi pakoyetakiri ñantsi ikamitakimirorika apatani, tema ari okantakotari iroperotatsiri pantayitakiri, tsikakobentantsipaye ejatsi antabaiyitatsiri.
• Pamakobentyaro pibayetakiri internet-ki airora poinijayetsiro iro pashiperori oka pakoyetakiri itsikaperoitatsori. Kimitachari iropero antabairi, airotsi akamantakotsiro.
• Pamanantakotero okaratsi osankinatakota iropero tsikakobentemini ejatsi obakoyetaka iroperori ashi aipatsiteke, anampipayeki ejatsi kipatsipayeki aminakoyetsirori ontsikakobentya maroni antabairentsi yakoyetakiri omanaperotatya ejatsi kamantanyetsirori.

Iroperori obakoyeta antabairentsi tsikabenteroni okantajetajai:

• Pimanakoperotero maroni pikantakiri obakiraini: Airora akamantakojetsirini okaratsi pakoyetakiri ñantsi antabairentsi aritaki amitakotakimi abirori ejatsi irontapaye, poinijayero aririka paminakoperotakiro tsika okantakotari iroperotakirika o airorika iroperotsi.
• Pimanakoperotero patsiro pikametantero “Irotaki pishikoiratantakari” iroperotantyari maroni pantayetakiri ejatsi airotsi okantsi ainijantakakero maroiteniki atsiriyitatsiri: Aparopaye nampitsi aritaki ontsikakobentayetakiri irashi “kamantantatsiri” aritakiamirika sankenarentsi aritakirika onkamitakotemi okaratsi pantayetakiri.
• Piyotakotakiro tsikama poinijantakotero pantabaire: Tsikarika poinijantakotero aritaki onkoñatakotaki kametsa irotaki tsikakobentemini maroni pantayetakiri ejatsi Akobaperotatsiro ainijayero maroni antayetakiri.