Por Júlio Lubianco, original para LJR

Traducción: Marishöri Samaniego

Akoyeterorika abisayitaintsiri ashi antabakantsipaye tera oshiyakotyaro pairani tsimakotanaintsiri irashi kamantakoyetantatsiri sankenamentoki antabaijetatsiri janta América Latina-ki. Antabakantsipayeka oshekitakotsi wirakochamashiki kimitanainchari ontsimakotsi otsipapayeki nampitsipayeki, akoyetsirori maroni abisayitatsiri ontsimatsi yamakobentajetyanita intsipayeni karira ayotakotsiri abisatsini. Abiantyarori kamechaini ontsimatsi amakobentajetya ayetanaki paperishi asankinatakotantyarori ejatsi akotero ñabaimentotsiki.

Irotaki akoyetsirorika maroni abisayitatsiri ashi antabakantsipaye ontsimatsi yamakobentajetya yañantari kametsa kitaiterikipaye. Aritaki yantabakajetakia imontsabakajetakiarika antakotsirori amonkori ontsimakirika kisabakantsi ejatsi sorokopayeni yantabakabentajetya imontsajetakiarika obayeritantsipayeni.

Tsame añantyaro antayetakiri ejatsi tsame aminabajiro amitakotantsi.

Pinkatsabentsirori iroka kamantakotantsipaye ashi TV Globo ashi nampitsi Brasil janta Belo Horizonte, Marcelo Moreira, ijajetaitsini yometantsipankoki ashi amakobentantsi irashi akoyetakirori kamantakotantsipaye otanakaro osarentsi 2006, opoñantanakari pairani iskoerajetanakini maroni akoyetakirori kamantakotantsipaye janta Rio ashi Janeiro ejatsi janta São Paulo.

Oka ñantamentotsika, ikantaki Moreira, aritaki ontsimaki apite oriatsiri antabaitantsipaye ejatsi antabaitantsi apitetakotero kitaiteriki añantantyarori iroperotakirika ejatsi maroni aminakotero tsika onkantakotari sankinamentoki. 

Yometantsipankoki iñantajetyaroni maroni yantayetakiri, Yokapayeka kamantakotantatsiri ontsimatsi yabisakojeteroni manatakotantsi, aritaki onkantapintatya yabisakojeteni akoyetsirori maroni abisayetatsiri antabakantsiki ejatsi yamakobentajetyani abisatsini janta Río.
Marcelo Moreira, ashi TV Globo: añantaperotantyarori antayitakirika akotantayitatsiri maroni antabakantsi ontsimatsi abakoyetante otsipa antabaiyitatsiri ejatsi sankinatakoteroni.

“Isaikakoyetsinta aripirityaki, aritaki isaikayeni iñantajetani maroiteni kamantakoyetantatsiri. Yoinijayitaitsiri maroni okaratsi tsimakoyetatsiri balística-ki ejatsi ontsimatsi yapayajetanakiani. Aritaki yoinijayetsiriri irashi apani abintakotantsipaye, yamayakojetantyari. Oka iroperotaki obametantsi yamayakotantanakiari ontsimakirika kariperotantsi antabakayetachani”, ari ikantanaki Moreira a LJR.

Kamantantsinkari, jebatanakirori apatotantsi brasileño irashi kamantantsinkaripaye aminakotsirori tsika onkantakotari opoñantanakari (Abraji) janta 20212 ejatsi 2013 aritaki oinijanaka aparopaye kinkitsarentsi iroperori irashipaye saikayetaintsiri janta onpamakotantantsinta.

“Airora pikatsiyira intatsikiroki inchato makarataintsiri. Paminaperoterora inchatoperori batsanto, pamayakotantyarori aririka imanatakoyetakimiririka aritaki ontsikaobentakimi. Aririka pinkobaki pimaña intatsikiroki shiyakomentotsiki, paminaperoterora pisaikantyari ontsikamentoki motor-ki, airorikaja pisaikakirika otapiki carrocería-ki, aritaki apakimi baraki, ari ikantaki. 

Severino Silva, shiyakantakotakirori maroni abisayitaintsiri kariperotantsi antabakantsipaye biracochamashiki janta Rio ashi Janeiro osheki osarentsi yoinijayetakiro janta ñanamentotsiki paitanainchari O Kitaiteri, okantakobentajetsirini maroni kamantakotantatsiri ontsimatsi yaminaperojeteni Tsikarika ijajeteni ejatsi apitsiro tera isaikanaji ibatsa kipatsiki tema yakojetatsiro ashi manatantsipaye kariperori.

“Aririka ajate apani nampitsiki antyarori maroni abisakoyetatsiri manatantsiki, nokantapintajetsirini ontsimatsi pamayajetyanira pinkiriaperote ejatsi pikimayenpitate ejatsi airora piñabaijetsini. Ejatsi ontsimatsi pishiro Irora ringtone irashi pichoritote, intaini pibakotero oshebatantyari airotsi opoimatanta. Ejatsi aririka pakotero pishakanterika, airora pibakotsiro omorikantyari”, okinkitsatakiro jaka LJR.

Tsame aminaperotabajiro amakobentantyari

Tekiratsika entyarota antayeteri, ontsimatsi ibitsijetya ejatsi osheki iñantajetyaroni, ari otanakaro okinkitsatakotanakari. Apani Abakotero patsiro airo okobenkatsi, oyatantyari kametsa maroni ontsimatsi akotero maroni abisayitatsiri kariperotantsi abisatsini aririka akoyetero, terika abishi ontsimatsi amakobentya antabakantsipaye.

Jetakantanakirori ejatsi CEO ashi GJS, onatsi pankotsipanko estadounidense antakotanakirori oka yometantsika ejatsi amitakoyitsiri maroni kamantakotantatsini aririka yabisakote obayeretantsiki, Frank Smyth, ibamiyitsiri eskoerayitatsiri, saikaintsini osheki inajetatsi kamantakotantatsiri ashi aminakoyetsirori okaratsi maroni abisayitaintsiri, ontsimakotanakita apani “amayakotantyarori maroni abisatsiri kariperotantsi kobenkataintsiri” aririka akotero ñabaimentotsiki. Iroka sankinatakotanaka maroni antayeteri, iyotakoitakiro ejatsi iroperotaki ñakarontsi aparoni, airorikaja pakotakiri ñabaitakirori irimachitaki yantakiro kariperotantsi o terika Aripirityakiri koshikabaitaintsiri ikoshite, pashini okantakotanajia abiantyarori aritantyari 7 a 10. 

“Otanakia piñanateri atsiriyitatsiri kari abishimoteriri kariperotantsipaye. Intaini pikinkitsatakayeri abisayitakiri kariperotantsi, aririka otsonkanakiarika maroni piyotakotakirika abisayitaintsiri”, ari ikantakiri Smyth a LJR, irimachitaki sankinatakirori tsika onkantyari yamakobentajetyarini kametsa isaikajetantyari irashi kamantakotantatsiri ashi CPJ, osaikakoyetsi kametsa obakoyetanaka sankenarentipaye ashi tsikama okantakotyari antabakantsipaye yashi sorokopaye, ejatsi yakoyeteri koshikabaitaintsiri ejatsi koshitantatsiri.

Yokapayeka kamantakotantatsiri abisayitaintsiri, yaitanakiri itsipatanakari pashinipaye itsipamintsaripaye akoyetakirori obayeretantsi abisaintsiri Golfo-ki janta 1991. “Amakobentajetyanimi ejatsi ajajetajimini asaikabitaniranki, atsipatanajiarimi pashinipaye atsipamintsaripaye, Irokantsimaitacha asaikajetanajini irotaki abishimotantakairi kariperotantsi. Irotaki abamitantayetariri yomitantsipankoki patsiro ikoshikabaijetenita yaminaperotantyarori kametsa yantabaijeterika”.

Irokantsimaitacha airora pitsainkirotsira pikantayeti tera onkantya kametsa sankinatakotainchani paperishiki apinkatsateri amayantyari kametsa yashi kamantankotantsiri tera apaniroini yakoyetero maroni abisayitatsiri aririka ityankayiteririka yakotantero kinkitarentsipaye. Amayakoteroni inajetatsini jebajetsironi kametsa sankenarintsipaye, ari ikantakiri Moreira. Irashi Jetakantanakirori ibinkatsari yashi kamantakotantatsiri ashi Globo janta Belo Horizonte, otsinkamentokinta ontsimatsi opanpitsashiriya kametsa aminakotero maroni yamayantajetyari irashi tsonkayetakirori eskoerayetaintsiri, poñaka pashinipaye pinkatsatsirori yoinijantero maroni abisayitatsiri ejatsi sankinatakotsirori ontsimatsi ijajeteni yometantsipankiki itsipajetyarini akoyetsirori maroni abisayitatsiri, iyotantyarori paitarika abisatsini aririka yantabaijeteni.

“Yometantsipankoki antabaijetsini osheki oshitobantyari kametsa sankenarentsi iyotakotantajetanakiarini tsikama onkantyari yantabaijeteni akoyetanteroni maroni abisayitatsiri intatsikiroki abotsiki. Tera onkompityatsi antyankayiteri apani atsiri bitsikainchani antabaitantsiki maroni ibamiyitaitakiri. ¿Tsikama inkantakojetyarini akoyetantakirori maroni abisayitaintsiri kariperotantsipaye aririka amashetakiarika maroni kinkitsarentsi? Ari asaikakoterorika okobenkatakinta, ¿Tsikama akantakoterorika aminiro kametsa ayotakotantyari tsikama isaikayeni? Otsimatsi antsimakote tecnología ejatsi aminakotero tsika onkantakotyari antabairentsi atsipajetanakiari pinkatsabentsirori. Airotsi yantakotsiro akotantatsiri kamantakotantsipaye” Ikantaki Moreira.

Janta México-ki, iroka nampitsi ontsimakotaki osheki kamantakotantatsiri ibayitakiri janta América Latina, oka ONG obakotanaka 19 iroperori ñantsi amayakobentajetsirini maroni kamantakotantatsiri akoyitsirori janta antabaitsinkaripaye jebatanakirori anampi, amakobentantsi abisatsiri, obantayetatsiri poñaka antsirori amonkori kariperori.

Okaratsi aminakojetakironi jebatanakirori amakobentantsi ashi ONG janta México-ki, Itzia Miravete, ontsimatsi apatyabakajetanakiani amitakotantsi patsiro atsikabentanakia ejatsi amakobentajeteri maroni tsonkayetakirori eskoerayitatsiri kametsa aritaki amakobentakia. Ejatsita aminakotanakiro obakotanakia sankenarentsiki maroni abisayitaintsiri, kimitachari ajariantayitatsiri o airorika manatantatsiri, onkoñatakotanakiata kametsa amakobentantsi ejatsi amakobentyaro pokatsini kitaiterikipaye.

“Ayotakotakirorika maroni ajarimatajairi, kimitachari amitakoyiteri ejatsita antabayitero sankenarentsi tsikakobentajairi patsiro onkoñatakotanaki pashini shintsinkantsi tsikakobenteroni kametsa maroni pokatsini oshintsitatsi kariperotantsiri. Otsonkantanajiari akantayetakiri maroni aminakoteroni ontsimakote tsikakobenteroni Irokantacha ejatsi amakobentantyari aririka abisayetaki kariperotantsi kimitanainchari ikisamoitajairika aminabajiro kamechaini kantsimotajairi abatsaki” ari ikantakiri Miravete a LJR. 

Oshiyaroni obayeretantsi

Antabakantsipaye abisatsiri América Latina abisayitapintayitsi okimitanakaro pashinipaye ejatsi kimitanainchari abisayitatsiri kariperotantsi aririka ajajeitini akotantayetero maroni abitsini obayeritantsiki. Tema ari ayotakotanakiro intsipaite maroni abisaintsiri irashi akotantakirori osheki janta América Latina-ki kimitanainchari janta obayeritantsiki otsipaye nampitsipayeki.  

Ontsimatsi ashikiro kamantakotantsipaye tekiratsita oshitobakoteta sankenarentsiki ejatsi ontsimatsi apatojetyani kametsa patsiro amakobentajetyani, kimitanainchari atsikakobentero aitoinaki, mantsakentsi tsikakobenteroni aririka imanaitajairika. Ayotero tsika akiniri kametsa, ayotakotero abotsipaye ejatsita tsikama okantya amairiajeteni kametsa ejatsi aririka amontsakotyari aminirori amakobentantsi o terika ejatsi koshintsipayeni; iro kantacha tekiratsita abiaperojetirota.

Yotakoyetsirori ashi amakobentantsi onkantaki aririka amontsakiarorika ontsimatsi akaimakanteri tsonkayetakirori eskoerayitakirori poñenkari inampiteki iritaki amitakotajairi kametsa “Akoperori inatyi” akoyeteroni maroni abisatsini nampitsipayeki.  
Yoka amitakotajairi kametsa “Akoperori inatyi” ipaitanakia fixer, aritaki yamitakotakai maroniki antabairentsiki: aritaki inijakairo abotsi, amakobentajaini ejatsita anteroni kinkitarentsipaye.

“Maroni okapayeka, abiroka yotsiro tsika onkantya pañantari. Iritaki aminaperotsirori tsika onkantya amabentakotyaro abisatsiri patsiro airo amontsakotaro janka intatsikiroki, tema iritaki iyoperotsirori maroni ipatsiteki. Arajaimi airo itsimanaitsimi atsirira oinijakenari janta intatsikironta, arimachi ibatsinaitanakina. Yoka fixer kobityachani osheki, airotsi anintanajiro akitsatanajiaro mantsakentsi tsikakobentajairi aririka imanayetakai barakipaye”, ari ikantanaki LJR akotakirori maroni abisayitaintsiri brasileño paitanainchari Yan Boechat, janta ostobakotanakinta ashi aminakotantsi televisión-ki Band, yakotakiro maroni abisayitaintsiri kariperotantsipaye nampitsikipaye kimitanainchari Venezuela, Afganistán, Siria, Irak, Etiopia poñaka Ucrania. 

Irokantacha, aririka antabaitakayetakiri apani fixer yotaperotsirori abisayitatsiri kariperotantsipaye iro kantacha kobakotanaichari kiriki apinatantyariri yantabairi ejatsi apinaperoteri ipashajetantyari. Iropero inajetatsini kamantakotantatsiri yotsirori amakobentya: Antabaiyetatsiri apaniroini o terika akotantatsiri maroni abisayitaintsiri kariperotantsi sankinatakoyitsirori tera intsimakojeteni irikite iro kantsimaitacha irijitaki jajetatsini yakojeteroni maroni abisatsiri kariperotantsipaye. 

“Airorika pitsimakotsi pirikite, aritaki abishimotakimi paitarika. Pitsimakotakirika kapichaji pirekite, aritaki onkantakia pantitakeyaro. Pantabaite osheki oriatsiri papipapitero Pantabaite osheki oriatsiri airotsi yanteta pitsimakotantyari pishakomentote, ejatsi airotsi pitsimakotsi apani atsiri fixer-tatsiri. Poñaka pamashetakiro terika pinkobabitakiaro”, Ikantaki Boechat.

Kamantakotsirori maroni abisayitatsiri yantabaijetsini inampitsiteki aritaki iyotakotakiro maroni inampitsiteki airotsi ikobanajiri apani fixer, airorika antsimakotsi kimitachari pashinipaye tsimakotanaintsiri. Akoyentantatsiri yapatoyetanaka ashi kamantantsipaye irijitaki kamechaini iyomeyitakiri tsika ikantajetyani yamakobentajetyanita o terika ontsimatsi yapatojetyani antabaitsinkaripaye apaniroini o terika akoyetantatsiri kari tsimatsini irikitepaye. 

Terika pinkobi airo pijatsi

Ayotakotakirorika ashi amakobentantsi kametsa ejatsi tsimayitanaintsiri pashinipaye amakobentantsipaye ijajetantyari yakojetero abisaintsiri kariperotantsi, Maroni kamantakotantatsiri ontsimatsi isakajeteni kametsa apampitsashiriantyari patsiro airo ishinkibintanta, ejatsi ontsimatsi amakobentyaro añantari: atsonkantanajiarori tera apantabo ayoyetero kinkitsarentsi.

“Ontsimatsi añaperotantyaro maroni antayeteri, airotsi atsarobabentsiro. Nanteromitsi janta nampitsiki Irak o terika pashiniki nampitsi, nokatsiyaninte kapichini nopanpitsashiriaya, kobenkataki”. “Iroperotaki pipampitsashiriakari”, ikantaki Smyth.

Severino Silva ikantaki “Tera shiyakamento pañantari kametsa (…) pasankani osaikakoyetsi janta intatsikironta ejatsi airorika okantsimotami kametsa, airo pijatsi”.